Awami National Party (ANP) ne sadarati intikhabat mein Asif Ali Zardari ki himayat ka ilaan kar diya.
People's Party ke wafd ne Char Sada ke Bacha Khan Markaz mein Awami National Party ki qayadat se mulaqat ki jis mein maujooda siyasi surat-e-haal par tabadla khayal kiya gaya, People's Party ke wafd mein Shireen Rahman, Nadeem Afzal Chan aur Nayar Bukhari shamil the.
ANP ki senior qayadat ke alawah Senator Hidayatullah Khan aur Senator Arbab Omar Farooq Kasi bhi mulaqat mein maujood the.
Bacha Khan Markaz ki janib se jari Ilaamiye mein bataya gaya ke PP wafd ne ANP se sadarati intikhabat mein Asif Zardari ke liye himayat ki darkhwast ki taham ANP ne parlaimani siyasat mein hissa nahi lenay ka faisla kiya hai. Baad azan Asif Ali Zardari ki qayadat mein wafd ne sadar ANP Khyber Pakhtunkhwa Emil Wali se mulaqat ki jis ka ilamiya People's Party ki janib se jari kiya gaya jis mein bataya gaya ke ANP sadarati intikhabat mein Asif Ali Zardari ki himayat karegi
Taham tarjuman ANP Zahid Khan party ke is faislay se laa'ilam nikle aur unhon ne kaha ke Asfandyar Wali ne parlaimani intikhabat ka hissa nahi bannay ka ilaan kiya tha.
Zahid Khan ke mutabiq pehla bayan party ke markazi sadar ka tha, ab Asif Zardari se mulaqat soobai sadar ne ki, yeh party ke markazi aur soobai sadar ka mamla hai jise dono ne khud hal karna hai.
