Malala Yusufzai Ka Apne Shauhar Asar Malik Ki Baatein Aur “Sex Bomb” Wala Waqia

Nobel inaam yafta Malala Yusufzai ne apni aanay wali swanah-e-amri “Finding My Way” mein pehli dafa apne shauhar Asar Malik ke saath rishta aur mohabbat ki kahani bayan ki hai. Yeh kitab 21 October ko shaya hogi.

28 saal ki Malala, jo duniya bhar mein ladkiyon ki taleem ke liye awaaz buland karne wali sab se kam umar ki Nobel inaam yafta shakhsiat hain, ne apni kitab mein Oxford University mein taleem ke doran ke tajurbe, zaati jazbaat aur Asar Malik se taalluq ke aghaz par khul kar baat ki hai.

Vogue magazine ke ek excerpt ke mutabiq, Malala ne bataya ke Oxford mein taleem ke doran unho ne apni shohrat ki wajah se rishte ko khufia rakha.

Unho ne likha:

"Asar ki aamad ne Oxford mein mere teesre semester ki udasi ko khushiyon mein badal diya, magar hamara rishta kisi filmi kahani ki tarah asaan nahi tha. Mujhe har waqt ye khadsha rehta tha ke kahin koi humein dekh na le."

Malala ke mutabiq, ek din woh Asar ke saath chehel qadamii kar rahi thin jab ek khatoon ne unhe pehchan kar tasveer lene ki koshish ki.

"Mein foran ek jhaadi ke peeche chhup gayi, jis se Asar aur security team dono ghabra gaye."

Unho ne bataya ke shuru mein apne waliden se rishte ko chhupane ke liye kai tadabeer karni padin. Ek moqa par woh shalwar qameez pehen kar ghar se nikli taake walida mutmain rahein, magar restaurant pahunch kar kapde badal kar modern libaas aur heels pehen liye.

Malala ne ek dilchasp waqia bayan kiya:

"Jab mein wapas mez par aayi to Asar muskurane laga, usne meri kursi kheench kar kan mein kaha: 'You are a sex bomb!' Mein sharm ke mare chehra napkin ke peeche chhupa liya."

Malala ne bataya ke jab unho ne apne walid ko pehli dafa bataya ke woh Asar ko pasand karti hain to unho ne kaha:

"Dad, mujhe woh acha lagta hai… romani tor par. Lekin aap ammi ko abhi mat batain."

Magar unke walid ne foran walida ko ittila de di, jisme Malala ki walida ne kaha:

"Bilkul nahi! Kya woh Pashto bolta hai? Use Pashtun ladke se shadi karni chahiye!"

Malala ne likha ke unke waliden ko khadsha tha ke yeh rishta kisi scandal mein tabdeel ho sakta hai. Lekin Malala ne kaha ke woh rishte ko khatam nahi karna chahti thin, bas waliden ke saath kashidgi unhe pareshan karti thi.

Unho ne bataya ke Oxford ki taleem mukammal karte waqt unho ne Asar se kaha:

"Kya hum apne jazbaat ko kuch waqt ke liye rok sakte hain?"

Jis par Asar ne jawab diya:

"Shayad jazbaat aise nahi rukte, magar tumhare liye mein koshish karunga."

Yaad rahe ke Malala Yusufzai aur Asar Malik ne 2021 mein Birmingham, England mein saada nikah kiya tha.

Unki nayi kitab “Finding My Way” Atria Books (Simon & Schuster) ke zere-e-inteshar 21 October ko shaya hogi, jisme Malala ne apni zaati, taleemi aur jazbati zindagi ke ahem pehlu pehli dafa khul kar bayan kiye hain.