Jab aanchal se parcham bane
Sab se pehle to Wazira-e-Ala Punjab Maryam Nawaz ka shukriya ada karna hai. Unhon ne guzishta dinoN yeh da’wa kiya ke woh hamari tareekh ki woh pehli khatun hain jinhain giraftar karke jail mein un par bohat zulm kiya gaya. Banda-e-naachiz ne gustakhi karte hue is bayan ko ghalat qarar diya aur bataya ke Begum Nusrat Bhutto, Mohtarma Benazir Bhutto, Asma Jahangir aur Faryal Talpur samait kai doosri khawateen Maryam Nawaz se bohat pehle jail ja chuki hain aur Furkhanda Bukhari ne to Lahore ke Shahi Qila mein woh zulm aur tashaddud bardasht kiya jiska Maryam Nawaz soch bhi nahi sakteen.
Maryam Nawaz ke tareekhi lihaz se ghalat bayan ne aisi behas chedi ke Pakistan ke kone kone se mujhe paighamaat mile ke Furkhanda Bukhari samait un maa’oN, behnoN aur betiyoN ke naam saamne lao jinhon ne apni siyasi jidojehad ke baais qaid-o-band ki sa’ubatein bardasht kiN lekin aaj kisi ko unka naam yaad nahi. Pakistan ki tareekh par nazar daurayeN to Tehreek-e-Pakistan ki ek sargarm worker Begum Jehan Ara Shahnawaz ki beti Naseem Jehan ki giraftari bohat ahem hai. Naseem Jehan 1951 mein Rawalpindi Sazish Case mein apne khawand Major General Akbar Khan aur Faiz Ahmed Faiz ke saath giraftar huiN. Baad azaan woh PPP mein shamil huiN aur MNA baniN.
1978 mein Pakistan Federal Union of Journalists ne General Zia-ul-Haq ke martial law ke khilaf tehreek chalai to iss tehreek mein sahafiyon ne giraftariyan pesh kiN. In mein kuch khawateen sahafiyan bhi shamil theen. Senior sahafiya Fareeda Hafeez ne Islamabad se Lahore aa kar giraftari di thi. Mrs. Elizabeth Khalid aur Anwar Sultana ke ilaawa Journalism Department Punjab University ki do talibaat Durdana Yasmeen aur Rozi Majeed ne bhi Lahore mein giraftari di.
Iske ilaawa Tamkanat Ara, Asifa Rizvi, Hameeda Ghanghro, Nasreen Zahra aur Karachi ki Lala Rukh Hussain bhi iss tehreek mein giraftar huiN. Begum Nusrat Bhutto aur Mohtarma Benazir Bhutto bhi baar baar giraftar huiN aur maan beti ne apne aanchal aamriyat ke khilaf muzahimat ke parcham bana diye. PPP ki rehnuma Shahida Jabeen aur Surayya Sultana ko Lahore ke Shahi Qila mein band kiya gaya.
12 February 1983 ko Asma Jahangir, Hina Jilani, Bushra Aitzaz Ahsan, Madeeha Gauhar, Shehla Zia, Nigaar Ahmad, Rubina Saigol, Anees Haroon, Nasreen Azhar, Khawar Mumtaz, Kishwar Naheed, Shahtaj Qazilbash, Mehnaz Rafi, Shehnaz Wazir Ali samait bohat si khawateen ne Mall Road Lahore par Zia ke martial law qawaneen ke khilaaf jaloos nikala aur giraftar ho gayiN.
Iss jaloos ke baad Tehreek-e-Bahaali-e-Jamhuriyat mein tezi aayi aur Sindh mein bhi khawateen sarkoN par aa gayiN. Sindhyani Tehreek ki bohat si khawateen MRD ki tehreek mein giraftar huiN jinmein Shehnaz Rahu, Ghulam Fatima Palejo, Marvi Palejo, Maryam Rahu, Shehr Bano, 6 saala Shabnam Palejo aur kai doosri khawateen shamil theen.
Marhoom shaira Fehmida Riaz, Professor Afzal Tauseef, Abida Malik, Begum Qayyum Nizami, Begum Rana Shaukat Mahmood samait kai khawateen ne qaid ke dauraan tashaddud bhi bardasht kiya.
DSF ki worker Hameeda Gul ki umar sirf 15 saal thi aur unhen fauji adalat ne 6 maah qaid ki saza sunaai. Iss tehreek ke dauraan Tando Jam ke gaon Usman Enter se 19 aurateN giraftar ki gayiN jismeN do haamilah theen. Tashaddud se donoN ka hamal zaya ho gaya. Aik aurat ka naam Noor Khatoon tha. Use goli maar kar shaheed kar diya gaya. Noor Khatoon ka naam log bhool chuke. Lyari ki Maasi Sakina ko log bhool chuke jo bahali jamhooriyat ki tehreek mein baar baar giraftar hoti rahiN. Lahore ki Amma Pathani aur Amma Paras Jaan bhi logon ko yaad nahi rahiN jo jamhooriyat ki khatir baar baar jail gayiN.
General Zia ke baad General Pervez Musharraf ke daur mein bhi kai khawateen giraftar huiN. PML-N ki rehnuma Begum Tehmina Daultana ko 6 maah tak Kot Lakhpat Jail Lahore mein band rakha gaya.
Begum Kulsoom Nawaz ne jab bhi siyasi jaloos nikaalne ki koshish ki to unhen ghar par nazarband kar diya gaya. Aik dafa unko aur Tahira Aurangzeb ko Rawalpindi mein Najma Hameed ke ghar par nazarband kiya gaya. Tahira Abdullah, jo insani huqooq ki worker hain, unko Zia ke daur mein aik dafa aur Musharraf ke daur mein kai dafa giraftar kiya gaya. Haaliya daur mein unko Palestine ka parcham uthaanay ke “jurm” mein Islamabad se paanchvi dafa giraftar kiya gaya. Khatoon wakeel Iman Mazari aik martaba giraftar ho chukiN, aajkal unko social media par taaqatwar logon ke tarjumaan dobara giraftari ki dhamkiyan de rahe hain.
Yeh durust hai ke Imran Khan ke daur mein Maryam Nawaz ko Adiala Jail mein unke walid Nawaz Sharif ke saath qaid rakha gaya aur un se na-rawa sulook bhi hua. Lekin ab to Maryam Nawaz Wazira-e-Ala Punjab hain. Unke daur mein to Punjab ki kisi jail mein koi ek bhi khatun siyasi qaidi nahi honi chahiye thi, lekin Dr. Yasmeen Rashid aur Imran Khan ki ahliyah Bushra Bibi samait kai khawateen aaj siyasi ikhtilaaf ke baais Maryam Nawaz ki qaidi ban chuki hain. PPP bhi apne aap ko shaheedon ki party kehti hai. Is party ki jamhooriyat ke liye bohat qurbaniyan hain lekin Balochistan mein iss party ki hukoomat ne jhootay muqadmaat mein kai khawateen siyasi workers ko nazarband kar rakha hai.
Kal hi Karachi University ki aik khatun ustad ne mujh se darkhwast ki ke main nai nasal ko Furkhanda Bukhari par hone wale zulm-o-sitam ki tafseel se zaroor aagaah karun taake pata chale ke fauji dictators iqtedar mein aa kar kya karte hain. Furkhanda Bukhari ne apni aap-beeti “Yeh Baazi Ishq Ki Baazi Hai” mein Lahore ke Shahi Qila mein apne saath hone wale tashaddud ki tafseel likh di thi. Woh Urdu aur Farsi ke aik professor Shehret Bukhari ki ahliyah theen.
Unhein Zia ke daur mein Lahore ke Mohni Road se unke ghar se utha kar Shahi Qila mein band kar diya gaya. Na kisi adalat mein pesh kiya gaya, na ahl-e-khana ko bataya gaya ke unhein kahan rakha gaya hai. Furkhanda Bukhari se kaha gaya ke woh Begum Nusrat Bhutto ke khilaaf yeh bayan de dein ke unhon ne hamen Libya meiN training ke liye bhejne ka plan banaya tha. Furkhanda Bukhari ne inkaar kiya to unke jism ko jalte hue cigarettos se daagha gaya, unke baal noch liye gaye. Doosri taraf Begum Nusrat Bhutto unko dhoondti phir rahi theen aur apne jalson mein “Furkhanda Bukhari zindabad!” ke naare lagwati theen. In naaroN ki wajah se Shahi Qila mein un par tashaddud aur barhta tha.
Fauji afsaron ne Furkhanda Bukhari par itna zulm kiya ke aik lady constable ne unke ghar walon ko khufiya taur par bata diya ke un par Shahi Qila mein tashaddud ho raha hai.
Furkhanda Bukhari ne apni kitab mein likha ke unhon ne Zia ko bad-dua di thi ke tumhein qabar bhi naseeb na ho. Zia ki haadsaai maut ke baad jab Mohtarma Benazir Bhutto pehli baar Wazir-e-Azam baniN to woh Furkhanda Bukhari ko hukoomat mein lana chahti theen. Furkhanda Bukhari ne kaha ke “Main aakhri saans tak aap ke saath rahungi magar maine aap ka saath wazir ban ne ke liye nahi diya.”
Aaj aap ko PPP aur PML-N mein Furkhanda Bukhari jaisi kitni be-loos aurateN nazar aati hain? Aaj PPP aik aise nizaam ka hissa hai jiska aik stakeholder Maryam Nawaz kehti hain ke woh Pakistan ki pehli khatun hain jinhain giraftar karke zulm ka nishana banaya gaya. Yeh bayan sirf ghalat nahi takleef-deh bhi hai. Humne Maryam Nawaz ki giraftari ki bhi muzammat ki thi aur aaj unki hukoomat ne jin khawateen ko jailon mein band kiya hua hai, unki giraftari ki bhi muzammat karte hain.
Jin khawateen ka is mukhtasir tehreer mein zikr nahi aa saka, un se maazrat. Aur Maryam Nawaz ki khidmat mein Israr-ul-Haq Majaz ka yeh sher pesh hai: