Benazir Bhutto jaisi unki beti Asifah Bhutto Zardari ko Peoples Party ne Wazir-e-Awla Sindh na bana kar bazahir ek tareekhi moqa ganwa diya hai. Unhein Karachi ke ilaqe Liaquatabad ya Sindh ke digar shehri aur dehi ilaqon ke mahfooz halqon se election ladwa kar ba aasani soobai assembly ka rukn muntaqil karwaya ja sakta tha.
Is ke baraks Maryam Nawaz ka Wazir-e-Awla Punjab banaya jana Pakistan ki tareekh mein munfarid waqia zaroor hai magar ghair mutawaqqa nahi, mujh jaise aam sahafi ne November mein daleel ke sath wazeh kar diya tha ke Noon League Maryam Nawaz ko Wazir-e-Awla Punjab banayegi.
Yaqeenan Peoples Party bhi is iqdam se waqif thi aur Maryam Nawaz se ye aizaz cheena nahi to kam az kam barabar zaroor kar sakti thi.
Maryam Nawaz ke mulki tareekh ki pehli Wazir-e-Awla ban kar tareekh raqam karne dene mein bhi bazahir Peoples Party ki siyasi tadbeer nazarati hai.
Do wajuhat ki bunyad par kaha ja sakta hai ke Peoples Party ne position mein hone ke bawajood Asifah Bhutto Zardari ko Wazir-e-Awla Sindh banane se guraiz kiya. Pehli aur sab se ahem baat shayad yeh hai ke Peoples Party ke banne wale shaheed Zulfikar Ali Bhutto hon, unki ahliya aur sabiq Khatoon-e-Awal Nusrat Bhutto, khud Bhutto ki beti Benazir Bhutto houn ya unke shohar Asif Zardari aur ab teesri pidhi mein Bilawal Bhutto Zardari, in mein se kisi ne bhi soobai satah se siyasat ka aghaz nahi kiya.
Zulfikar Ali Bhutto ne Ayub Khan ki cabinet mein bator Wazir-e-Commerce apni siyasat ka aghaz kiya, kayi aur wazaratein sambhaliin aur phir mulk ke sadr aur Wazir-e-Awla bane.
Shohar ko amar General Zia-ul-Haq ke dor mein phansi di gayi to Begum Nusrat Bhutto siyasi tor par mutaharrik hui aur 1988 mein Larkana se Qaumi Assembly ki nisbat par muntakhib hui, woh Benazir Bhutto ki cabinet mein Wazir aur Naib Wazir-e-Azam bhi rahi thi.
Zulfikar Ali Bhutto ki siyasi janasheen aur badi beti Benazir Bhutto bhi 1988 hi mein pehli baar Larkana se Qaumi Assembly ki rukn muntakhib hui thi, Pakistan hi nahi Musalman mumalik ki pehli khatoon Wazir-e-Azam ko is baat ka bhi aizaz hasil hai ke Pakistan mein aaj tak koi khatoon esi nahi jo pehli baar rukn Qaumi Assembly bantay hi Wazir-e-Azam ke mansab par faaiz ho gayi ho.
Benazir Bhutto ke do bhaiyon Mir Murtaza Bhutto aur Mir Shah Nawaz Bhutto mein se sirf Murtaza Bhutto hi intekhabi siyasat mein fa'al hoye. Benazir Bhutto ke ek bar Wazir-e-Azam banne ke baad jilaawatni khatam kar ke woh Pakistan aaye to unhonein subai siyasat apnayi thi.
Is sawal par ke halaat ki nazakat jante hue aap ne Murtaza Bhutto ko watan wapsi se roka nahi tha, Benazir Bhutto ne mujhe ek interview mein kaha tha ke Murtaza apni marzi se watan wapas aaye the, establishment ne ek teer se do shikaar kiye the, bhai ko maar diya gaya aur unki hukoomat giradi gayi.
Is mein do raaye nahi ke Murtaza Bhutto karshamati shakhsiyat ke hamil the magar woh apne walid Zulfikar Ali Bhutto ke siyasi janasheen nahi the kyunke Bhutto ne Jiyalon ko musallah jaddojahad par is waqt bhi nahi uksaya tha jab Musalman mumalik ke is maya naz tarin rehnumaon mein se aik ko General Zia ne apni gardan bachane ke liye takhta daar par bhej diya tha.
Benazir Bhutto ke shohar Asif Zardari 1980 ki dehaai ke aakhir mein mard-e-awwal to bane magar unhone is dor mein Qaumi ya Subai Assembly se election ladne se guraiz kiya tha, woh pehli baar rukn Qaumi Assembly 1990 mein bane the.
Peoples Party ke khilaf mahallati saazishon aur establishment ki kar guzariyon ka shikar hokar unhone jeelain kati, tashadud saha aur mukhalifeen ki janib se 'Mr. Ten Percent' kahlaye, halankay Benazir unhein Pakistan ka Nelson Mandela aur Mard-e-Hur kehti thin.
Asif Zardari ne Benazir Bhutto ki shahadat dekhi, taham amreetaur dahshatgardon se intiqam ke liye jamhooriyat ko hathiyar banaya.
Ittefaq yeh hai ke Hakim Ali Zardari ne bhi 1972, 88 aur 93 mein teen elections Qaumi Assembly ke lade, Asif Zardari ki behne Faryal Talpur aur Doctor Azra Pechuho ne bhi Qaumi Assembly ka election kar ke hi amli siyasat ka aghaz kiya tha, yeh alag baat hai ke ab ek arsey se woh Sindh Assembly ki faa'l rukn hain, unhein bhi Wazir-e-Azam Sindh banaya ja sakta tha magar Peoples Party ne shayad jaan boojh kar aisa nahi kiya.
Jahan tak Bhutto khandan ki teesri nasal ka talluq hai to usne bhi qaumi satah se hi amli siyasat ka aghaz kiya. Bhutto ke siyasi waris aur Benazir Bhutto ke jansheen Bilawal Bhutto ne apne nana ki tarah Larkana hi se Qaumi Assembly ka election lada. Bukhtawar Bhutto Zardari ne un ke jalsay mein to shirkat ki magar amli siyasat se tahal gareez kiya hai.
Libas aur andaaz se Benazir Bhutto jaisi Asifa Bhutto intekhabi muhim mein ghair mamooli had tak faal rahin. Jalsay, relion mein shirkat aur jiyalon ke ahl-e-khana ki diljoi karne wali Asifa Bhutto ke bare mein aam tasur tha ke woh ye election ladengi.
Subai assembly ki nisbat se election ladti to ba aasani muntakhib ho kar Sindh ki kam umar tareen aur pehli Wazir-e-Azam bhi ban sakti thin.
Mulk ki siyasat ke doosre bade gharaane Sharif family mein Miyan Nawaz Sharif houn, un ke bhai Shahbaz Sharif, bhatija Hamza Shahbaz ya beti Maryam Nawaz sab ne apni siyasat ka aghaaz Punjab mein subai satah se kiya.
Yeh kehna ghalat nahi hoga keh nah sirf Sharif khandan balkay Noon League ki Punjab samait mulk ke mukhtalif hisson mein siyasat Nawaz Sharif hi ki marhoon mant hai. Ek dor tha keh Miyan Nawaz Sharif is ittehad IJI ka bhi hissa the jo Benazir Bhutto ke khilaf banaya gaya tha. Is ittehad mein shamil mazhabi Jamaatiyun ne ek khatoon ke Wazir-e-Azam banne ke khilaf thi aur is naam par Benazir ko iqtedar se bahar rakhne ke liye har qadam par taiyar thi.
‘Badalta hai rukh aasman kaise kaise‘, aaj un hi Miyan Nawaz Sharif ki beti Maryam Nawaz Wazir-e-Azam Punjab hain, walid ki tarah zairak aur walida Begum Kulsoom Nawaz ki tarah diler, shayad woh din bhi door nahin keh Maryam Nawaz apne walid Miyan Nawaz Sharif ke naqsh qadam par chalte hue wazarat-e-aala se wazarat-e-azmat ka safar tay karein.
Peoples Party ke rehnuma kehte hain ke Maryam Nawaz ko mulki tareekh ki pehli Wazir-e-Awla banne ka moqa de kar Asif Zardari ne ek baar phir sabit kiya hai ke jamhooriat hi behtareen intiqam hai.
