Islamabad High Court ke cheh Jajon ne Pakistan ki sab se badi khufia agency par bade sangin ilzamat aed kar diye hain.
Chief Justice of Pakistan ko likhe gaye apne khat mein un cheh Jajon ne Justice retired Shaukat Sadiqi ke case ka hawala de kar unki taraf se 2018 mein lagaye gaye ilzamat par tahqiqat ka mutalba karte hue yeh bhi demand kiya ke Supreme Judicial Council yeh bhi dekhe ke agencies ki adalati mamlaat mein mudakhilat 2018 ki tarah kiya ab bhi to jaari nahi.
Apne khat mein un cheh Jajon ne mukhtalif waqeat ka zikr karte hue likha ke mubin tor par kis tarah Jajon par khufia agencies ki taraf se un par dabao dala ja raha hai, unke qareebi azeezon ko harassment aur un par tashaddud tak kiya gaya, ek Jaj ke sarkari ghar ke bed room aur drawing room mein video recording ke aalaat fix kiye gaye.
Is khat ne ek bhoonchal sa peda kar diya hai. Agar ek taraf Tehreek-e-Insaf un Jajon ko hero bana kar pesh kar rahi hai aur yeh demand kar rahi hai ke cheh Jajon ke khat ke baad Imran Khan ke khilaf di gayi tamam sazawon ko kalaadham qarar diya jaye to doosri taraf Noon League ke rehnumaon ki taraf se un Jajon ko apna maazi yaad karwaya ja raha hai jab un mein se kuch mubin tor par kisi ke dabao par Noon Leagueiyon ke khilaf faislay dete the.
Khawaja Saad Rafique ne yaad karaya ke chand saal pehle jab woh aur un ke bhai Islamabad High Court raahdari zamaanat lene ke liye aaye to unka Jajon ne mazaq uraya tha. Woh kehte hain ke chalein achha hua ab zameer jaag rahe hain.
Noon League ke hi senator Irfan Sadiqi ne sawal uthaya ke in cheh Jajon ne mubinah mudakhilat par khud action lene aur dabao dalne walon ka naam lene ki bajaye kyun mamla Supreme Judicial Council bhej diya. Sadiqi sahib ka kehna, aise moqay par jab 9 May ke mujrimon ko sazaain di jane ki tawqee, un Jajon ke khat ne ek makhsoos party ki sahulat kaam kiya hai.
Unhon ne un cheh Jajon mein shamil chand Jajon ko yaad dilaya ke woh chand saal pehle tak kaise faislay kar rahe the. Bar Councils ki taraf se un Jajon ke khat likhe jane ko saraaha ja raha hai jabkeh ek wakeel sahib ne Supreme Court mein darkhwast daal di ke un Jajon ke khat ki tahqiqat ke liye Judicial Commission banai jaye.
Is darkhwast mein ilzam lagaya gaya ke yeh khat taye shuda mansooba ke tehut likha gaya jis ne adalat ko scandalize kiya. Tehreek-e-Insaf samt mukhtalif atraaf se is khat par tahqiqat ke liye commission banane ka mutalba kiya ja raha hai jo meri nazar mein ek behtareen tajwez hai.
Is silsile mein Chief Justice Qazi Faez Isa ki taraf sab dekh rahe hain ke woh kab aur kya faisla karte hain. Yeh baat durust hai ke aise mamlay ke hal ke liye Supreme Judicial Council shayad moaser idara nahi. Zarurat is amr ki hai ke kya jo ilzamat jajon ne lagaye us mein kitni haqeeqat hai aur agar yeh sabit ho jata hai ke agencies ki adalati mamlaat mein mudakhilat hai to usay rokne ke liye kya kiya jaye.
Cheh Jajon ne apne khat mein agar ke jisatice retired Shaukat Sadiqi ke ilzamat aur un ilzamat ki bunyad par sabiq ISI chief General Faiz Hameed ka naam likh kar tahqiqat ka mutalba kiya lekin khud apne sath hote hue waqiat ka zikr kar ke kisi agency ke afsar ya ahlkar ka naam nahi liya.
Un Jajon ke khat se yeh tasur ubharta hai ke unko apne chief justice Islamabad High Court par etmad nahi. Ek baat jo main ne mehsoos ki ke justice Shaukat Sadiqi ke hawale se aaj jo baat ki ja rahi hai woh mazi mein un jajon aur supreme court aur high court ke doosre jajon ki taraf se kyun nahi ki gayi.
Shaukat Sadiqi ko un ke ilzamat par naukri se nikaal diya gaya lekin koi ek jaj beshmol Islamabad High Court ke jajon ke, nah bola. Sadiqi sahib ne koi paanch chhe saal bohot mushkilat dekhein, unke case ko supreme court tak mein nahi suna ja raha tha balkay Islamabad High Court ke chand ek jaj Shaukat Sadiqi sahib ke naam lene par charh jate the.
Agar Shaukat Sadiqi ke sath unke Islamabad High Court ke apne hi jaj khare hote to aaj shayad bohot kuch badal chuka hota, adalat ki halat mein shayad kuch behtari bhi nazar aati. Chalein der ayeid durust ayeid.
Aaj Islamabad High Court ke cheh jajon ne Shaukat Sadiqi ko ek qabil taaqeed misaal ke tor par pesh kiya. Siyasi danaan aur siyasi jamaaton ne un jajon ke khat par apne apne mafadat ke mutabiq siyasi karenge lekin ahem baat yeh ke jo unhone agencies par ilzamat lagaye us par fori tahqiqat ki jayein aur is ke liye Qazi Faez Isa ko fori faisla karna hoga.
