Badin Mein Sarkari Mulazmeen Ke Masail Par Guftagu"

 

Badin : Subai Muhtasib Aala Sindh Ki Khasoosi Hidayat Par Regional Director Muhtasib Aala Badin Manzoor Ali Sumro Ki Janib Se District Accounts Office Badin Mein Khuli Kachehri Ka Ineqad Kiya Gaya. Tafseelat Ke Mutabiq Mehkma Khazana Ke Zila Daftar Badin Mein Munqadah Khuli Kachehri Mein Mukhtalif Idaroun Ke Sarkari Mulazmeen Ne Apne Masail Pesh Kiye. Is Mauqe Par Masail Ke Hal Ke Liye Aane Wale Logon Ne Pension GP Fund Aur Tanqaeem Samait Mukhtalif Muamlaat Ke Hal Ke Liye Regional Director Muhtasib Aala Ne Logon Ke Masail Ghor Se Sune Aur Bohat Se Masail Fori Hal Karne Ke Ahkamat Jaari Kiye. Khuli Kachehri Doran Regional Director Manzoor Ali Sumro Ne Mehkma Khazana Ke Afsoon Ko Hidayat Dehte Hue Kaha Ke Khuli Kachehri Ka Maqsad Sarkari Mulazmeen Aur Retired Mulazmeen Ke Masail Ko Tarjeehi Bunyadon Par Hal Karna Hai. District Account Officer Badin Muhammad Aalam Sumro Ne Briefing Dehte Hue Bataya Ke Is Mahine LPAR Ke 230 Cases, GP Fund Ke 227, Pension Ke 29 Aur Graduate Ke 25 Cases Mukammal Ho Chuke Hain. Unhon Ne Mazeed Kaha Ke Zaroori Objections Ki Ilawah Is Waqt Koi Bhi Case Pending Mein Nahi Hai. Is Mauqe Par Assistant Registrar Subai Muhtasib Aala Abdul Sattar Memon, Accountant Guljee, Accountant Mujtaba Kareem Memon Aur Mukhtalif Idaroun Ke Retired Aur Hazir Service Mulazmeen Ne Badi Tadad Mein Shirkat Ki.